Princ Leka ka shpërndarë një mesazh për qytetarët e Kosovës në prag të zgjedhjeve parlamentare të nesërme. Ai ka theksuar rëndësinë e ushtrimit të të drejtës së votës, duke nënvizuar se Kosova duhet të tregojë se është një partner i besueshëm për Shtetet e Bashkuara të Amerikës.
Princ Leka ka uruar partitë politike për zhvillimin e fushatës zgjedhore dhe ka apeluar për angazhimin e qytetarëve për të treguar angazhimin e Kosovës për vlerat demokratike dhe marrëdhëniet me partnerët ndërkombëtarë.
Mesazhi i plotë:
Të dashur bashkëkombas,
Në këtë prag zgjedhjesh në Kosovë, dëshiroj t’ju përcjell urimet e mia dhe të përgëzoj të gjitha partitë politike për fushatën e deritanishme.
Më lejoni t’ju drejtohem me një thirrje të sinqertë: Ushtrojeni të drejtën tuaj për të votuar!
Pjesëmarrja në zgjedhje dhe votimi janë ndër mënyrat më të rëndësishme për të kontribuar në forcimin e demokracisë dhe ndërtimin e një të ardhme më të mirë për vendin.
Gjithashtu, kjo është një mënyrë për të shprehur mirënjohjen tonë, një nga virtytet që na karakterizon, për ndihmën e vazhdueshme dhe për të dëshmuar se dimë të ndërtojmë një shtet të fortë mbi vlera demokratike. Po ashtu, tregon se jemi një partner i besueshëm për miqtë tanë ndërkombëtarë, me SHBA-në në krye, së cilës historikisht ne si shqiptarë ia dedikojmë vetë ekzistencën tonë kombëtare.
Le ta kthejmë këtë ditë në një festë të demokracisë, duke dëshmuar edhe një herë pjekurinë dhe përgjegjësinë tonë qytetare, ashtu siç kemi bërë gjithmonë dhe ashtu siç na bën krenarë kudo.
Vëllazërisht,
Leka II
