Kryeministri Edi Rama deklaroi sot se hetimin që solli 24 urdhër arrestet tek Universiteti Bujqësor e nisi SHISH dhe policia e shtetit. Por, theksoi se nuk do të pranojë që Gjykata e Posaçme të pranojë, duke noterizuar cdo kërkesë për burg të SPAK-ut.
“Hetimin tek Bujqësori e ka nisur SHISH dhe policia e shtetit, e them këtë për dy arsye se e para nuk ka degë dhe nuk ka gjethe afër rreth meje që nëse i ka hyrë miza, unë e shmang krasitjen, përkundrazi. Unë nuk kam asgjë kundër hetimit, përkundrazi e inkurajoj deri në fund, por ama këto paraburgimet me një të rënë të lapsit dhe këto noterizimet në gjykatën speciale me filozofinë që çfarë çojmë ne atje ata vetëm e firmosin se ne jemi Amerika, këto nuk i pranoj më dhe nuk kam për t’i pranuar më dhe jam i bindur që shqiptarët e ndershëm mendojnë kështu. E kemi parë ne këtë film të kohëra të tjera. Prandaj demokracitë e kanë ndërtuar këtë sistem balancimi” tha ai.
