Kryeparlamentarja Elisa Spiropali zhvilloi takime me Grupin e Miqësisë Poloni-Shqipëri, ku diskutohet forcimi i bashkëpunimit parlamentar, krijimi i platformës për investime polake në Shqipëri, shkëmbimi i eksperiencave për integrimin evropian dhe nxitja e integrimit rajonal.
Spiropali po zhvillon një vizitë zyrtare në Poloni, shoqëruar nga deputetët Mimi Kodheli, Anduel Tahiraj, Milva Ekonomi dhe Eralda Bano.
“Me Grupin e Miqësisë Poloni-Shqipëri, u diskutua mbi forcimin e bashkëpunimit parlamentar, krijimin e një platforme për investime polake në Shqipëri, shkëmbimin e eksperiencave për integrimin europian, dhe nxitjen e integrimit rajonal përmes bashkëpunimit mes qeverisjes vendore”, shkruan Spiropali.
Në një deklaratë të përbashkët, ajo theksoi marrëdhëniet e shkëlqyera mes dy vendeve dhe mbështetjen që Polonia ka dhënë për Shqipërinë në proceset e rëndësishme.
