Perdja po bie ngadalë
Në teatrin e mugët të kukullave,
perdja rrëshqet si një psherëtimë e rëndë,
dalëngadalë zbulohet ferri i fshehur,
një tablo e zezë ku fije të padukshme lëkunden në hapësirë.
Maestroja, hije gjigante me penj të ndryshkur,
për dekada ka luajtur me shpirtra të gjallë,
tani veprat e tij shkëlqejnë si kristale të ftohta,
të mprehta sa t’i presin mishin e shpresës.
Kukullat, të rreshtuara në skenën e kalbët,
valëviten nën dritën e zbehtë të turpit,
pozicione të llogaritura për një sistem që shpirt jep,
një faqe e zezë ku historia gjakon rëndë.
Jashtë teatrit, njerëzit e ndershëm,
si lule të shkelura nga çizmet e rënda,
u degraduan,
me një britmë u shpallën tradhtarë,
zërat e tyre u mbyten nën peshën e gënjeshtrave,
Fabrikimet ishin një lumë me një rrjedhje dhe vrull të shpejtë rrufe.
Porositë ranë si shpata e Skënderbeut mbi kokën e atyre që atdheun e deshën mbi gjithçka:
burgosje, prishje familjesh, lot që digjeshin,
surgjynosje, si era që shpërndante hire të ferrit,
vrasje që lanë jehonë në shpirtin e tokës.
Të rinjtë, me ëndrra të copëtuara,
u dëbuan me një plan të zi, afatgjatë,
si zogj pa krahë, të hedhur në humnerë.
Biznesi lulëzoi mbi ajrin e helmuar,
kancer që ha mushkëritë e të gjallëve,
deponi të egra, që as toka nuk i mban,
qenia jonë, e shtrirë për një grusht ashte,
e tregtuar si plaçkë në tezgën e pazarit,
gjigand sa toka e ferrit,
që shtrihet përtej fushëpamjes së syrit tonë.
Perdja po bie ngadalë,
kukullat plandosen për tokë një nga një, si gjethe të vyshkura,
të braktisura nga dora që u dha jetë.
Maestroja, si Titaniku në mes të akullit,
qëndron i ngrirë, i heshtur, i paveshur me fjalë,
gishtat të mpirë, si timoni i një anijeje të humbur,
mendja e tij — një oqean i zi që e thërret poshtë,
në qetësinë e tmerrshme të fundosjes së pashmangshme,
ku as vdekja nuk i ofron strehë,
por vetëm përqafimin e ftohtë të humbjes së vetvetes
Të paktën, si burrë po jep shpirt,
veti kjo që nuk e ka pasur kurrë sa ka qenë gjallë.
-Arbër Çeliku- profesor universitar, gjuhëtar, publicist, shkrimtar, përkthyes dhe zë i fortë për mbrojtjen e të drejtave të shqiptarëve në Maqedoninë e Veriut
