Vrasësi i Ilaria Sulës dyshohet se është ish i dashuri i saj Mark Samson pasi njollat e gjakut janë identifikuar nëpër dhomat e shtëpisë. Gjithashtu disa njolla gjaku janë parë edhe në muret e korridorit të banesës në via Homs 8 në Romë, në lagjen afrikane ku ndodhi krimi.
Policia mjeko-ligjore gjeti sasi të madhe gjaku te dushi, në lavamanët e tualetit e kuzhinës, si dhe në furçat e dyshemesë, dorezat e derës së përparme të makinës së Samsonit. Sipas hetimit, vrasja ka ndodhur mbrëmjen e 25 marsit dhe jo mëngjesin e datës 26, siç deklaroi autori i dyshuar.
Në 26 mars, Mark Samson bleu produkte pastrimi në një dyqan mallrash shtëpiake dhe detergjentesh dhe këtë e konfirmon një faturë e lëshuar nga dyqani që është afër shtëpisë, raporton TGCOM. Gjithashtu sipas hetuesve disa persona kanë ndërhyrë për të hequr gjakun.
