Presidenti i SHBA Donald Trump ka lënë të kuptohet se fundi i rritjes së tarifave hakmarrëse në luftën me Kinën është afër, ndërsa njoftoi një marrëveshje tregtare me Pekinin brenda disa javësh.
“Unë nuk dua që ato të rriten më, sepse në një moment të caktuar njerëzit nuk do të blejnë,” u tha Trump gazetarëve në Shtëpinë e Bardhë për tarifat, sipas Reuters. “Ndoshta nuk dua t’i rris ato, ose nuk dua ta arrij atë nivel. Mund të dëshiroj ta ul atë sepse, ju e dini, ne duam që njerëzit të blejnë dhe në një moment ata nuk do ta bëjnë,” tha ai.
Dje, të enjten, Trump tha se pret një marrëveshje me Kinën “brenda tre deri në katër javët e ardhshme”, e cila do të shënonte fundin e përshkallëzimit të luftës tregtare midis dy ekonomive më të mëdha në botë. “Unë besoj se do të kemi një marrëveshje me Kinën,” tha ai gjatë nënshkrimit të urdhrave ekzekutivë në Zyrën Ovale. “Mendoj se kemi mjaft kohë”.
Nuk pati asnjë konfirmim nga Kina nëse një marrëveshje ishte e mundur, dhe Trump shmangu pyetjet nëse Xi Jinping kishte bërë ndonjë propozim. Është hera e parë që mundësia e një marrëveshjeje tregtare SHBA-Kinë ka qenë në horizont që kur Trump rriti tarifat ndaj Pekinit, shkruan Business Insider.
