Ditën e sotme gazetarët e kameramanët e mediave në Kosovë kanë vendosur mikrofonët e kamerat e tyre në tokë në kohën që kryeministri Albin Kurti po dilte nga ndërtesa e Kuvendit për të shkuar në qeveri.
Ky veprim i gazetarëve ishte bërë në shenjë proteste pasi që Kurti nuk e ka thënë asnjë fjalë për mediat në asnjërën nga 5 mbledhjet e Kuvendit brenda një jave.
“Asociacioni i Gazetarëve të Kosovës i fton të gjithë aktorët politikë, dhe në këtë rast më së shumti kryetarin e partisë që ka fituar më së shumti ulëse në Kuvend, që të jetë transparent me mediat dhe publikun, për një temë kaq të rëndësishme siç është konstituimi i legjislaturës së re”, thuhet në faqen zyrtare të Asociacioni i Gazetarëve të Kosovës.
