Agron Shehaj ka reaguar pas suksesit të Partisë Mundësia në zgjedhjet e 11 majit, ku kjo forcë e re politike siguroi dy mandate në Kuvend. Në një postim në Facebook, Shehaj u shpreh se ky rezultat u arrit përkundër sistemit që, sipas tij, është ndërtuar për të penguar të rinjtë të ngjiten në skenën politike.
“Dy mandate, 50 mijë qytetarë që na besuan, pa pazare, pa premtime boshe. Kemi thyer një mur që dukej i pakalueshëm,” shkroi ai, duke theksuar se tani nis puna e vërtetë për të përfaqësuar zërin e qytetarëve dhe për të ndërtuar një opozitë moderne dhe të ndershme.
Shehaj ftoi mbështetësit të bashkohen me Partinë Mundësia, që ai e cilësoi si “opozita e shekullit 21” dhe si një forcë që sheh nga e ardhmja.
