Një javë pas përfundimit të zgjedhjeve të 11 majit 2025, Struktura e Posaçme kundër Korrupsionit dhe Krimit të Organizuar (SPAK) dhe Byroja Kombëtare e Hetimit (BKH) vazhdojnë hetimet për krimet zgjedhore të mundshme në Qarkun e Elbasanit. Burime zyrtare konfirmojnë se hetimet përfshijnë periudhën parazgjedhore dhe ditën e votimit, me fokus të veçantë në blerjen e votave, kërcënimet ndaj votuesve, dhe përdorimin e administratës publike për qëllime elektorale.
Grupet hetimore po mbledhin prova dhe dëshmi, përfshirë pamje filmike, komunikime elektronike dhe të dhëna të tjera që mund të dëshmojnë shkelje të ligjit zgjedhor dhe atij penal. SPAK dhe BKH po shqyrtojnë gjithashtu përfshirjen e grupeve të strukturuara kriminale dhe bizneseve të mëdha në procesin zgjedhor.
SPAK ka njoftuar se do të ndjekë penalisht çdo individ apo grup që përpiqet të dëmtojë integritetin e procesit zgjedhor dhe besimin e qytetarëve në demokraci. Gjatë fundjavës së kaluar, hetuesit u angazhuan në qytetet e Elbasanit, Peqinit dhe Librazhdit, ku po vijon dokumentimi i krimeve zgjedhore në një rajon që ka qenë nën monitorim të ngushtë nga autoritetet e zbatimit të ligjit.
