Pas një karriere të gjatë dhe të qëndrueshme në futbollin elitar, Taulant Xhaka ka vendosur të tërhiqet nga loja aktive. Klubi i tij i zemrës, FC Basel, organizoi një ceremoni prekëse lamtumire për mesfushorin shqiptar, duke e nderuar për përkushtimin dhe kontributin e jashtëzakonshëm që dha ndër vite.
Në ceremoninë përmbyllëse të sezonit, nuk mungoi as vëllai i tij, Granit Xhaka, i cili ndau me të momentet emocionale në fushë. Tifozët e Basel-it krijuan një koreografi të veçantë në nder të Taulantit, duke falënderuar për besnikërinë e tij ndaj klubit.
I përlotur, Taulant Xhaka përshëndeti publikun për herë të fundit si futbollist profesionist. Ai mbylli karrierën me mbi 400 paraqitje për Basel, duke fituar disa tituj kampion dhe duke u bërë një nga figurat më të dashura për tifozët.
Në arenën ndërkombëtare, Xhaka ka përfaqësuar Shqipërinë në 31 ndeshje, duke shënuar një gol dhe duke qenë pjesë e skuadrës historike që mori pjesë në “Euro 2016”. Ai u tërhoq nga Kombëtarja në vitin 2021.
