Një video e publikuar së fundmi në mediat greke ka dokumentuar momentin tronditës kur djali i një biznesmeni në Greqi arratiset nga duart e rrëmbyesve të tij. Ngjarja ndodhi mëngjesin e 6 majit në zonën e Hymettus, ku i riu u mbajt peng dhe u dhunua rëndë me mjete të mprehta.
Pamjet tregojnë momentin kur i riu, pavarësisht plagëve dhe lodhjes ekstreme, arrin të hapë derën e automjetit ku mbahej i izoluar dhe të largohet me vrap për të kërkuar ndihmë.
Rrëmbimi ishte organizuar nga katër persona me qëllime përfitimi financiar, mes tyre edhe një këngëtar i njohur lokal. Viktima ishte rrëmbyer nga një ambient shërbimi makinash dhe ishte torturuar përpara se të arrinte të çlirohej vetë.
Ngjarja ka shkaktuar reagim të fortë në opinionin publik grek dhe ka vënë në lëvizje strukturat e hetimit të krimit të organizuar. Autoritetet janë duke punuar për kapjen e të gjithë personave të përfshirë.
