Ish-deputeti i Kuvendit të Kosovës, Gramos Agusholli, është ndaluar nga autoritetet serbe në pikën kufitare të Merdarës gjatë një udhëtimi drejt Lubjanës. Lajmi është bërë publik nga vetë Agusholli përmes një postimi në rrjetet sociale, ku tregon se ndalimi ndodhi papritur dhe se situata ishte e tensionuar, sidomos për faktin që udhëtonte me familjarë.
Ai theksoi se, pas disa orësh, situata u zgjidh dhe ai vazhdoi rrugën për në Slloveni. Në të njëjtën kohë, ai shprehu mirënjohjen për të gjithë ata që ndihmuan në zgjidhjen e çështjes, duke falënderuar në veçanti Ministrinë e Punëve të Jashtme, Zyrën Ndërlidhëse të Kosovës në Beograd dhe kryeministrin Albin Kurti.
Reagimi i kryeministrit Kurti nuk mungoi. Ai e cilësoi ndalimin si një tjetër provë se Serbia nuk synon marrëdhënie normale me Kosovën. Sipas tij, raste të tilla janë përpjekje për të frikësuar qytetarët kosovarë dhe duhet të dënohen hapur edhe nga faktori ndërkombëtar.
Kurti gjithashtu falënderoi institucionet që vepruan me shpejtësi dhe i uroi Agushollit një qëndrim të mbarë në Slloveni.
