Drejtuesja politike për diasporën nga Partia Demokratike, Jozefina Topalli ka denoncuar farsën e votimit në diasporë.
Topalli shprehet se një person me emrin Sinan Patozi ekspozohet duke treguar zarfe votimi si pronësi personale. Ajo thekson se vota e emigrantëve është një e drejtë kushtetuese, jo një instrument në duart e partisë.
“Farsa e votimit te diasporës.
Kur militantët marrin përsipër të shpërndajnë dhe të mbledhin kutitë e votimit jashtë Shqipërisë, procesi zgjedhor humbet çdo besueshmëri. Kur një individ si Sinan Patozi – pa asnjë status zyrtar, por me lidhje të hapura partiake – ekspozohet publikisht duke trajtuar zarfe votimi si pronë personale, nuk kemi të bëjmë me zgjedhje të lira, por me një farsë të organizuar. Vota e emigrantëve është një e drejtë kushtetuese, jo një instrument në duart e partisë. Dhe kjo farsë e koordinuar përmes militantëve është një tjetër dëshmi e manipulimit brutal që kërkon të vjedhë edhe diasporën.”, shprehet Topalli.
