Partia Demokratike ka reaguar pas publikimit të mesazhit të Këshilltarit të Lartë të Departamentit Amerikan të Shtetit, Samuel Samson, të shpërndarë nga Ambasada e SHBA në Tiranë. Sipas PD-së, deklaratat e tij përfaqësojnë një sinjal të qartë për gjendjen shqetësuese të demokracisë në vend.
Në një reagim zyrtar, PD thekson se qëndrimet e shprehura nga zyrtari amerikan, që prekin tema si shtypja e fjalës së lirë, emigrimi i detyruar, kufizimi i lirisë së besimit dhe manipulimi i zgjedhjeve, përputhen me realitetin shqiptar nën qeverisjen e Edi Ramës.
Sipas opozitës, këto fenomene janë bërë pjesë e funksionimit të përditshëm të qeverisë përmes një bashkëpunimi të dyshimtë me rrjete patronazhistësh dhe elementë kriminalë, çka ka çuar në deformimin e zgjedhjeve dhe shtypjen e opozitës.
PD rithekson se mesazhi i SHBA-së përforcon kërkesën për një qeveri teknike që do të mundësonte zgjedhje të lira dhe të ndershme. Ajo e konsideron këtë si një hap të domosdoshëm për të rikthyer besimin në institucionet dhe për të garantuar demokracinë funksionale në vend.
