Prej 1 qershorit është në fuqi marrëveshja mes Shqipërisë dhe Italisë që garanton pensionet për shqiptarët dhe italianët që kanë punuar në të dy vendet.
Kjo marrëveshje, e nënshkruar më 6 shkurt 2024 në Romë, lejon qytetarët të përfitojnë pension nga të dy shtetet, duke bashkuar vitet e punës në Shqipëri dhe Itali.
Përfituesit që nuk kishin më parë të drejtë pensioni, si ata mbi 67 vjeç që nuk plotësonin kushtet e viteve të punës, tani mund të marrin deri në 400 euro në muaj.
Qytetarët do të paraqesin kërkesën për pension në vendin ku jetojnë, dhe institucionet e dy vendeve do të bashkëpunojnë automatikisht për të përpunuar kërkesat, pa procedura të komplikuara.
Përveç pensioneve normale, përfshihen edhe pensione invaliditeti, ndihma për papunësi dhe shërbime shëndetësore për emigrantët që kanë kontribuar në të dy vendet.
Që nga viti 2005, Shqipëria ka lidhur 28 marrëveshje të ngjashme me vende të ndryshme për sigurimet shoqërore dhe vazhdon negociatat me vende të tjera.
Kjo marrëveshje përfaqëson një hap të rëndësishëm për të garantuar të drejtat sociale të emigrantëve shqiptarë dhe italianë dhe për të lehtësuar jetën e tyre.
