Komisioni Qendror i Zgjedhjeve nuk pranoi kërkesën e Partisë Demokratike për të hapur 43 kuti votimi në Vlorë, ku thuhej se mungonin fletë votimi të papërdorura. Por, me kërkesë të dy anëtarëve të KQZ-së, u hapën dhe kontrolluan 4 kuti, një për secilën bashki të qarkut.
PD pretendon se mungojnë rreth 130 mijë fletë votimi të papërdorura dhe ka bërë ankim. Në një nga kutitë e hapura në Vlorë u konstatua se fletët ishin të vulosura dhe në rregull.
KQZ ka mohuar mungesat, duke thënë se diferencat në numra janë për shkak të gabimeve teknike në procesverbalet e disa qendrave.
