Ministri i Shtetit, Taulant Balla, ka falënderuar raportuesin e Parlamentit Europian, Andreas Schieder, pas miratimit të raportit për Shqipërinë në Komitetin për Punët e Jashtme (AFET). Ai vlerësoi mbështetjen për përkushtimin e Shqipërisë ndaj anëtarësimit në Bashkimin Europian, ndërkohë që theksoi rëndësinë e vijimit të reformave.
Në reagimin e tij, Schieder u shpreh: “Shqipëria mund të quhet me krenari një ‘udhëheqëse’ ndër vendet kandidate për anëtarësim në BE. Kjo, falë mbështetjes së gjerë nga popullsia shqiptare. Por ende nuk jemi në vijën e finishit. Është thelbësore të vazhdohet me të njëjtin ritëm dhe përkushtim, duke luftuar korrupsionin dhe forcuar sundimin e ligjit. Duhet të theksohet nevoja për të zgjeruar modelin ekonomik, për të krijuar vende pune dhe për të përmirësuar modelin e mirëqenies sociale, si dhe për një reformë zgjedhore gjithëpërfshirëse dhe të plotë.”
Raporti do të shqyrtohet në seancën plenare të ardhshme të Parlamentit Europian.
