Kryetarja e Kuvendit të Shqipërisë, Elisa Spiropali, priti sot Kryetaren e Asamblesë Kombëtare të Bullgarisë, Nataliya Kiselova. Gjatë takimit u ritheksoi miqësia e fortë mes dy vendeve dhe bashkëpunimi në rrugën drejt Bashkimit Europian.
Pas takimit, Spiropali u shpreh se “marrëdhëniet politike midis Shqipërisë dhe Bullgarisë janë të shkëlqyera, të qëndrueshme dhe pa çështje të pazgjidhura mes nesh.” Ajo theksoi gjithashtu mbështetjen e fortë bullgare për integrimin europian të Shqipërisë, duke shtuar se “kjo mbështetje do të vijojë edhe për planin tonë ambicioz për përfundimin e negociatave brenda vitit 2027 dhe anëtarësimin në Bashkimin Europian brenda kësaj dekade.”
Spiropali shtoi se Shqipëria vlerëson shumë rolin e Bullgarisë në tryezat e Bashkimit Europian, veçanërisht në sfidat e sigurisë që sjell lufta në Ukrainë, dhe nënvizoi se “mosmarrëveshjet dypalëshe duhet të zgjidhen duke u mbështetur në vlerat europiane dhe marrëdhëniet e fqinjësisë së mirë.”
Në fushën ekonomike, ajo përmendi rëndësinë e projekteve të përbashkëta si Korridori 8 dhe nismat në turizëm, duke shtuar se “këto investime nuk janë vetëm ekonomike, por edhe kontribute për paqen dhe sigurinë.”
Të dyja kryetaret shprehën gatishmërinë për të zgjeruar bashkëpunimin parlamentar dhe për të forcuar lidhjet në kuadër të NATO-s dhe nismave rajonale si Procesi i Berlinit dhe SEECP.
