Autoritetet ukrainase kanë njoftuar se trupat e 1,212 ushtarëve të vrarë në konfliktin me Rusinë janë kthyer në Ukrainë, si pjesë e një procesi të riatdhesimit që po vazhdon mes dy vendeve. Komiteti për Koordinimin e Shkëmbimit të të Burgosurve bëri me dije në Telegram se trupat do t’i dorëzohen ekspertëve të Ministrisë së Punëve të Brendshme, agjencive ligjore dhe Ministrisë së Shëndetësisë për identifikim të shpejtë.
Marrëveshja për shkëmbimin e trupave të pajetë u arrit gjatë rundit të fundit të bisedimeve mes Kievit dhe Moskës, megjithëse zbatimi i saj ka patur vonesa. Më 2 qershor, presidenti ukrainas Volodymyr Zelensky deklaroi se Rusia synonte të transferonte 6,000 trupa, por vetëm një pjesë e vogël ishte identifikuar deri tani.
Së fundmi, Rusia dhe Ukraina shkëmbyen të burgosurit e luftës nën moshën 25-vjeçare, duke hapur rrugën për shkëmbime të mëtejshme. Megjithatë, luftime të ashpra vazhdojnë në rajonin lindor të Dnipropetrovskut, ku forcat ruse kanë avancuar në disa zona.
Në sfond të tensioneve të vazhdueshme, procesi i riatdhesimit të ushtarëve të rënë mbetet një aspekt i rëndësishëm humanitar në këtë konflikt të gjatë dhe të përgjakshëm.
