Në Spitalin Universitar të Patras është regjistruar një moment emocional i jashtëzakonshëm, ku stafi mjekësor ka nderuar në heshtje kujtimin e 14-vjeçarit Spiros, i cili humbi jetën tragjikisht në lumin Arahthos, ndërsa tentonte të shpëtonte shokun e tij 12-vjeçar.
Sipas raportimeve nga ERT News, pak para nisjes së procedurës për heqjen e organeve, mjekët dhe personeli shëndetësor u grumbulluan për një moment respekti dhe heshtjeje përpara sallës së operacionit. Ky akt ishte shprehje e dhimbjes së thellë për humbjen e dy fëmijëve dhe nderim për familjet që vendosën të dhurojnë organet e tyre për të shpëtuar jetë të tjera.
Procesi i transplantimit për organet e Spiros filloi në orët e para të mëngjesit të së dielës dhe përfundoi në mesditë. Veshkat dhe mëlçia e tij u dërguan për transplantim në spitalet “Laiko” në Athinë dhe “Ippokrateio” në Selanik. Ndërkohë, zemra dhe mushkëritë nuk ishin të përshtatshme për transplantim, por u krye edhe heqja e kornesë së syve, që do të përdoren gjithashtu për pacientë në nevojë.
Ndërsa dhurimi i organeve nga 12-vjeçari pritet të fillojë në orët e para të mëngjesit të së hënës, kjo ngjarje na kujton fuqinë e solidaritetit dhe dhurimit, edhe në kohë tragjike.
