Komisioni Qendror i Zgjedhjeve (KQZ) ka nisur procesin e rihapjes së kutive të votimit për 2323 qendra në 4 qarqe, ku PD ka depozituar ankime për zgjedhjet e 11 majit. Sot u hapën kutitë e Gramshit dhe Peqinit, ku po verifikohen fletët e votimit me materialet zgjedhore.
Demokratët kërkojnë prova për manipulime, duke ngritur dyshime për fenomenin e “të trenit bullgar”, ndërsa gjatë verifikimeve janë konstatuar disa mospërputhje të vogla si fletë me vulë të pamjaftueshme apo numër më i madh fletësh sesa votues.
KAS do të vendosë në fund mbi vlefshmërinë e rezultatit në qarqet e përfshira, ndërsa nesër nis rinumërimi i kutive në Tiranë, Fier dhe Durrës.
Procesi po zhvillohet me 24 tavolina numërimi dhe 63 punonjës të administratës zgjedhore, ndërsa KQZ deklaron se nuk do të kërkojë buxhet shtesë për këtë fazë.
