Kancelari gjerman Friedrich Merz në një intervistë për median ARD deklaroi se Izraeli ka të drejtën për vetëmbrojtje, duke i cilësuar sulmet ndaj Iranit si një përgjigje të nevojshme ndaj kërcënimeve që vijnë nga Teherani. Ai kritikoi regjimin e mullahëve në Iran, duke theksuar se ky regjim është përgjegjës për terrorin në botë dhe përpjekjet e tij për armatim bërthamor janë të papranueshme.
Merz tha se pas dështimit të përpjekjeve diplomatike dhe tërheqjes së SHBA-ve nga bisedimet bërthamore, Izraeli e ka marrë në mënyrë serioze kërcënimin dhe ka vepruar për të mbrojtur veten. Ai përmendi gjithashtu se shumë iranianë dëshirojnë të çlirohen nga ky regjim represiv dhe se do të ishte mirë që ndikimi i tij të përfundonte.
