Irani konfirmoi të mërkurën vdekjen e gjeneralmajorit Ali Shadmani, komandant i Shtabit Qendror Khatam al-Anbiya, pas plagëve të marra gjatë sulmeve izraelite javën e kaluar. Shadmani mori këtë post më 13 qershor, pas vdekjes së paraardhësit të tij gjatë sulmeve të para të Izraelit.
Shtabi Qendror Khatam al-Anbiya është një strukturë kyçe që koordinon ushtrinë e rregullt dhe Gardën Revolucionare të Iranit. Konflikti mes Izraelit dhe Iranit nisi më 13 qershor, me sulme të përditshme të dy vendeve për 12 ditë. Më pas, SHBA-ja ndërhyri duke goditur objekte bërthamore në Iran, duke deklaruar se ka goditur programin bërthamor të Teheranit.
Përpara nisjes së sulmeve, SHBA dhe Irani kishin zhvilluar disa raunde bisedimesh për çështjen bërthamore, të cilat u ndërprenë për shkak të eskalimit të konfliktit.
