Kina mirëpret sot ministrat e Mbrojtjes të Iranit dhe Rusisë në kuadër të një samiti të Organizatës së Bashkëpunimit të Shangait (SCO), në një kohë kur tensionet në Lindjen e Mesme janë përshkallëzuar ndjeshëm dhe pas një samiti të NATO-s që miratoi rritjen e shpenzimeve ushtarake.
Takimi zhvillohet pas arritjes së një armëpushimi midis Izraelit dhe Iranit, që i dha fund një konflikti 12-ditor mes dy vendeve. Ndërkohë, një ditë më parë, liderët e NATO-s u mblodhën në Hagë, ku vendet anëtare ranë dakord për një shtim të buxheteve ushtarake, si përgjigje ndaj sfidave të reja globale.
Ministri kinez i Mbrojtjes, Dong Jun, e cilësoi samitin në Qingdao si një përpjekje për të ofruar stabilitet dhe bashkëpunim në një botë që, sipas tij, po përballet me “kaos dhe paqëndrueshmëri”.
