Ish-prokurori i Durrësit, Arjan Ndoja, ka dhënë sot dëshminë në gjyqin për atentatin që iu bë më 1 nëntor 2019 pranë mbikalimit të urës së Shkozetit, ku mbeti i vrarë shoferi i tij, Andi Maloku, ndërsa Ndoja vetë u plagos rëndë. Për këtë ngjarje është arrestuar Plarent Dervishaj, i dyshuar si organizator i atentatit.
Gjatë dëshmisë, Ndoja rrëfeu momentet e sulmit duke treguar se plumbat erdhën nga dy armë, duke i goditur makinën në të cilën udhëtonin ai, shoferi dhe Aleksandër Laho. Ish-prokurori mohoi të kishte pasur konflikte ose borxhe që mund ta lidhnin me sulmin. Ai u shpreh se dëshiron të dijë arsyen e atentatit, pasi askush deri tani nuk i ka dhënë ndonjë shpjegim.
