Hugo Carvajal, ish-kreu i inteligjencës ushtarake të Venezuelës, ka pranuar fajësinë për akuzat e trafikimit të drogës dhe narko-terrorizmit në Shtetet e Bashkuara të Amerikës.
I njohur si “El Pollo”, Carvajal ishte pjesë e Kartelit të Diellit, një rrjet trafikantësh që përfshinte zyrtarë të lartë ushtarakë. Sipas prokurorëve amerikanë, ai ka ndihmuar rebelët kolumbianë të FARC duke u siguruar armë dhe duke mbrojtur dërgesat e kokainës drejt SHBA-së.
Carvajal, ish-besnik i ish-presidentit Hugo Chávez, është arrestuar në Spanjë pas një periudhe arratie dhe më pas u ekstradua në SHBA. Pranimi i fajësisë ngre dyshime për një marrëveshje me autoritetet amerikane për një dënim më të lehtë në këmbim të bashkëpunimit.
SHBA-ja akuzon gjithashtu presidentin aktual të Venezuelës, Nicolás Maduro, për narko-terrorizëm që nga viti 2020.
