Kryeministri i Greqisë, Kyriakos Mitsotakis ka premtuar që do të zbulojë deri në fund skemën e mashtrimit me subvencione nga Bashkimi Europian, që dyshohet të ketë funksionuar e pazbuluar në vend për vite me radhë. Ai pranoi se skandali i fundit ka zbuluar “paaftësinë e shtetit” në luftën kundër korrupsionit.
Skandali u shpalos me zbulimin se fermerë të rremë kishin përvetësuar fonde bujqësore në vlerën e rreth 290 milionë eurove, përmes një skeme mashtruese të subvencioneve të caktuara.
Mitsotakis njoftoi ngritjen e një grupi pune të posaçëm, i cili do të hetojë “menjëherë dhe në mënyrë të plotë” pagesat e dyshimta. Ai pranoi edhe dështimet e institucioneve shtetërore.
“Papërshtatshmëria e shtetit është e dukshme. Klientelizmi nuk mund të qeverisë mënyrën se si ne zhvillojmë biznes”, tha Mitsotakis.
Gjithashtu u shpreh se task-forca do të veprojë me shpejtësi dhe kërkoi rezultate të menjëhershme.
“Pres rezultate shpejt. Do të hetojmë rastet menjëherë dhe në mënyrë të plotë, në përputhje me ligjet kombëtare dhe europiane. Meqë OPEKEPE nuk arriti ta kryejë detyrën, shteti do të marrë përgjegjësinë qëndrore”, shtoi ai.
