Kryeministri britanik Keir Starmer dhe presidenti francez Emmanuel Macron ranë dakord për nevojën e një veprimi më të vendosur kundër emigracionit të paligjshëm, veçanërisht lidhur me kalimet me varka të vogla në Kanalin e La Manshit.
Në një takim të zhvilluar në Londër, të dy liderët theksuan se ky fenomen përbën një kërcënim të përbashkët që kërkon bashkëpunim dhe zgjidhje të koordinuara. Ata njoftuan planet për masa të reja e inovative, duke përfshirë krijimin e një mekanizmi të ri për të goditur modelin financiar të rrjeteve kriminale që trafikon emigrantë me pagesa të larta.
Ky diskutim vjen në një periudhë kur emigracioni i parregullt mbetet një sfidë serioze për të dy vendet, veçanërisht gjatë sezonit të verës, kur përpjekjet për kalime të rrezikshme përmes detit shtohen ndjeshëm.
