Ish-ambasadori gjerman, Werner Daum, ndërron jetë në Shqipëri ku kishte mbërritur prej disa ditësh. Ai vdiq në moshën 82-vjeçare.
Daum u gjet i pajetë në dhomën e tij të hotelit. Ka ndërruar jetë për shkaqe natyrale. Daum mori pjesë para pak ditësh në inaugurimin e shtatores së dëshmorit të demokracisë, Josif Budo në Kavajë.
Gjatë vizitës në Bashkinë e Kavajës, ish-ambasadori gjerman Werner Daum u nderua me një Certifikatë Mirënjohjeje nga kryetari Fisnik Qosja, për kontributin e tij në momentet historike të vitit 1990.
Daum ishte ambasador në Shqipëri nga 1987 deri në vitin 1990, pikërisht në kohën kur nisi lëvizja kundër regjimit komunist. Ai hapi dyert e ambasadës gjermane për shqiptarët.
