Gjatë 24 orëve të fundit janë raportuar 21 vatra zjarri, nga të cilat 5 vatra janë ende aktive. Në përditësimin e radhës Ministria e Mbrojtjes bën të ditur se këto vatra zjarri janë evidentuar në bashkitë: Dibër, Vlorë, Rrogozhinë, Tiranë, Kamëz, Dimal, Përmet, Këlcyrë, Gjirokastër, Librazhd, Belsh, Lezhë, Kurbin, Roskovec, Pogradec e Korçë.
Aktualisht mbeten aktive vatrat në qarkun e Dibrës në vendin e quajtur “Livadhi i Peladhisë”, në Zerqan, te “Liqeni i Luleve”në Parkun Kombëtar të Lurës, fshatin Zambisht të Tiranës, në Polis të Librazhdit dhe në fshatin Udenisht të Pogradecit.
Zjarret janë regjistruar kryesisht në sipërfaqe me shkurre dhe bimësi, ku si pasojë janë djegur rreth 91 hektarë sipërfaqe dhe 20 rrënjë ullinj.
Në operacionet për shuarjen e zjarreve u angazhuan 38 automjete zjarrfikëse dhe 459 forca. Gjithashtu në operacionet e ditës së djeshme morën pjesë edhe Forcat e Armatosura me 90 efektivë dhe 3 helikopterë.
Ministria njofton se i gjithë sistemi i mbrojtjes civile vijon të jetë në ndjekje të situatës dhe në gatishmëri të plotë për ndërhyrje të shpejtë.
