Gjykata Kushtetuese ka vendosur të mos kalojë për shqyrtim ankimin e Marjan Rrokut, ish agjentit të SHISH. Ai është i dënuar me burgim të përjetshëm për vrasjen e të dashurës së tij dhe nënës së saj në vitin 2001 në Tiranë.
Marjan Rroku u dënua në mungesë nga drejtësia shqiptare në vitin 2002. Më pas u arrestua në SHBA dhe u ekstradua në Shqipëri në vitin 2014, kohë nga e cila vuan dënimin.
Rroku kishte kërkuar edhe shfuqizim të tre shkallëve të gjykimit për vendimin që i refuzoi atij kërkesën për pavlefshmëri të urdhrit të ekzekutimit të vendimit penal të dënimit.
Sipas Rrokut, urdhri i ekzekutimit ishte i pavlefshëm, pasi ishte firmosur vetëm nga kryesuesi i trupës dhe jo nga dy anëtarët.
Kushtetuesja nuk e legjitimoi Rrokun për ankimin ndaj tre vendimeve të burgut përjetë, për shkak se është paraqitur përtej afatit ligjor.
