Ernest Lama 24 vjeç dhe Gëzim Hoxhaj 32 vjeç, dy të rinj nga Tirana, ndodhen në gjendje të rëndë në Spitalin e Traumës në Tiranë, pasi u plagosën me armë zjarri në një lokal në Sarandë më 17 korrik.
Policia ka shpallur në kërkim katër persona të dyshuar si autorë ose ndihmës të krimit: Ramadan Zoto alias Ramadan Canaj 43 vjec, i cili akuzohet për vrasje të mbetur në tentativë, dhe Erjon Canaj, Artan Murtaj e Klaus Jaçaj, për “përkrahje të autorit”.
Hetimet paraprake tregojnë se konflikti nisi për motive të dobëta, dhe gjatë përplasjes fizike, Ramadan Zoto ka qëlluar me armë drejt viktimave. Në vendngjarje janë sekuestruar një pistoletë “Beretta”, një krehër me 9 fishekë dhe 4 gëzhoja.
Ndërkohë, edhe Gëzim Hoxhaj u arrestua në kushte spitalore, pasi gjatë kontrollit iu gjet një tjetër armë zjarri. Ai përballet me akuzën për mbajtje pa leje të armës. Policia po vijon punën për kapjen e të dyshuarve dhe dokumentimin e plotë të ngjarjes.
Të shtënat me armë në Sarandë, dy të plagosur e katër të dyshuar në kërkim
