Prokuroria e Romës ka kërkuar gjykim të menjëhershëm për Mark Antony Samson, i cili ka pranuar fajësinë për vrasjen e ish-të dashurës së tij, Ilaria Sula.
Mark Samson pasi e vra Ilarian në apartamentin e tij më pas e fshehu në një valixhe dhe e hodhi në një greminë në zonën e Capranica Prenestina në Itali. Në lidhje me vrasjen e Ilarias është dhe nëna e Samson e cila dyshohet se e ka ndihmuar atë në fshehjen e trupit.
Pas kërkesës së prokurorisë ka ardhur edhe një reagim nga familja e Ilaria, ku babai i saj është shprehur sërish se kërkon drejtësi për të bijën.
“Ata njerëz i kanë shkaktuar shumë dhimbje familjes sime. Shpresoj që drejtësia të vihet në vend”, ka deklaruar Flamur Sula, babai i Ilaria-s për ANSA.
“Ilaria kishte gjithë jetën përpara. Nuk është e drejtë që princesha ime të përfundojë në këtë mënyrë të tmerrshme. Kam besim në drejtësinë italiane,” përfundoi Flamur Sula.
