Qarkullimi në Urën e Milotrit është mbyllur për shkak të rrezikut dhe sigurisë. Autoriteti Rrugor Shqiptar ka reaguar në lidhje me arsyen e mbylljes së Urës së Milotit.
Sipas ARRSH, Ura e Milotit ka dëmtime në themelet mbështetëse, ka erozion të theksuar në bazament, si dhe ka gërryerje në shtratin lumor.
Në njoftim thuhet se gjatë periudhës së ndërhyrjes do të përdoren rrugët alternative: rruga kryesore Lezhë-Milot dhe rruga e Kombit.
Reagimi i ARRSH:
Ura auto-hekurudhore e Milotit, me një gjatësi prej 788 metrash, paraqet një rrezik serioz për qëndrueshmërinë dhe sigurinë e kalimit, si pasojë e:
• dëmtimeve të konsiderueshme në themelet mbështetëse,
• erozionit të theksuar në bazament, për shkak të shfrytëzimit të pakontrolluar të zhavorrit të lumit,
• dhe gërryerjeve në të gjithë shtratin lumor.
Bazuar në ekspertizën teknike dhe duke marrë parasysh trafikun e rënduar, veçanërisht gjatë sezonit veror, është marrë vendimi për mbylljen e plotë të urës dhe ndërprerjen e qarkullimit, deri në përfundim të projekt ndërhyrjes emergjente që po hartohet nga Autoriteti Rrugor Shqiptar, në bashkëpunim me Universitetin Politeknik të Tiranës. Kjo ndërhyrje do të zbatohet menjëherë në ditët në vijim.
Ndërkohë, ndërtimi i urës krejtësisht të re është parashikuar nga ARRSH si pjesë e programit “100 Ura”, i cili realizohet me mbështetjen e Bankës Botërore.
Gjatë periudhës së ndërhyrjes, rekomandojmë përdorimin e këtyre rrugëve alternative:
• Rruga kryesore Lezhë – Milot
• Rruga e Kombit
Të nderuar qytetarë dhe përdorues të rrugës, kjo ndërhyrje është thelbësore për të garantuar sigurinë e të gjithë komunitetit. Ndërgjegjësohemi për vështirësitë dhe shqetësimet që mund të shkaktojë mbyllja e përkohshme e urës, por kjo masë është e domosdoshme për të shmangur rreziqe më të mëdha dhe për të siguruar një infrastrukturë të qëndrueshme dhe të sigurt në të ardhmen.
