Raportet mes Italisë dhe Rusisë u acaruan ndjeshëm pas publikimit nga Ministria e Jashtme ruse të një liste me emra të cilësuar si “rusofobë”. Në këtë listë përfshihen figura të larta italiane, përfshirë presidentin Sergio Mattarella, ministrin e Jashtëm Antonio Tajani dhe ministrin e Mbrojtjes Guido Crosetto.
Kryeministrja italiane Giorgia Meloni dënoi publikimin si një “operacion propagandistik” nga Moska, që ka për qëllim të largojë vëmendjen nga përgjegjësitë e Rusisë për agresionin në Ukrainë.
Meloni theksoi se Italia mbetet e palëkundur në mbështetjen ndaj Ukrainës dhe shprehu solidaritet të plotë me zyrtarët italianë të përfshirë në listë.
Ndërkohë, ministri Tajani reagoi menjëherë duke thirrur ambasadorin rus në Romë, Alexei Paramonov, dhe dënoi ashpër këtë veprim, duke e cilësuar si provokim ndaj shtetit dhe popullit italian.
Kjo situatë pasqyron tensionet e thella diplomatike mes dy vendeve, të cilat janë rritur në sfondin e luftës në Ukrainë dhe sanksioneve ndërkombëtare kundër Moskës.
Italia riafirmoi pozicionin e saj në mbështetje të sovranitetit ukrainas dhe e dënoi ashpër agresionin rus.
