Partia e Lirisë ka reaguar ashpër ndaj projektit për ndërtimin e 17 kullave dhe rezidencave private në zonën e Farkës, duke e cilësuar si një veprim pa transparencë dhe të nxitur nga interesa klienteliste.
Përmes një deklarate të këshilltarit bashkiak Artan Distafa, PL e konsideron projektin si “strategji plaçkitjeje”, që përjashton qytetarët dhe institucionet vendore nga vendimmarrja.
Sipas PL, ndërtimet e fundit në Tiranë po zhvillohen pa asnjë konsultim publik dhe përbëjnë një krizë të thellë të qeverisjes lokale.
Partia kritikon përqendrimin e pushtetit në duart e qeverisë qendrore dhe të Këshillit Kombëtar të Territorit, të cilin e cilëson si një organ të politizuar dhe autoritar.
PL kërkon ndërprerjen e menjëhershme të lejeve të ndërtimit të dhëna pa transparencë, rikthimin e kompetencave vendore dhe një auditim të pavarur për lejet e dhëna në dekadën e fundit.
“Nuk do të rrimë më të heshtur ndërsa qytetet tona betonohen pa ajër dhe pa jetë,” thuhet në deklaratë. “Shqipëria është për qytetarët, jo për klientelën e radhës.”
