Presidenti Donald Trump njoftoi të premten, 1 gusht, shkarkimin e Erika McEntarfer, shefes së Zyrës së Statistikave të Punës (BLS), pas publikimit të një raporti për tregun e punës që tregoi rritje të dobët të vendeve të punës në korrik dhe rishikime të mëdha në ulje për muajt maj dhe qershor.
Trump e kritikoi McEntarfer-in si një emërim politik të administratës Biden dhe pa prova akuzoi se shifrat ishin manipuluar për të dëmtuar atë dhe republikanët.
Në përgjigjen e saj, McEntarfer e quajti kohën e saj si komisionere “nderin e jetës sime”, ndërsa e përshkroi punën e agjencisë si “jetike dhe të rëndësishme”.
