Kreu i Partisë Demokratike, Sali Berisha në një deklaratë për shtyp ka publikuar letrën ku sipas tij ministri i jashtëm kërcënon vëzhguesit ndërkombëtarë që të ndryshojnë raportin. Sipas Berishës, 11 maji ishte procesi më i diskredituar dhe më i korruptuari.
“Këtu para jush kam sjellë sot letrën kërcënuese që ministri i jashtëm i narkoshtetit, Igli Hasani, iu drejton me datën 12 maj, sapo lexohet raporti, zonjës Farah Karimi, koordinatore speciale dhe lider i misionit afatshkurtër të OSBE-së.
Ambasadorit Lamberto Zannier, kryetar i misionit të vëzhguesve të ODIHR-it.
Zotit Bjorn Soder, kryetar i delegacionit të asamblesë parlamentare të OSBE.
Zoti Simone Billi, kryetar i delegacionit të asamblesë parlamentare të Këshillit të Europës.
Dhe zotit Michael Gahler, kryetar i delegacionit të Parlamentit Europian.
Shikoni çfarë banditizmi, sapo kanë lëshuar komunikatën, atyre iu drejtohet kjo letër.
Pas kortezisë, në letër thuhet: ‘Lidhur me deklaratën e gjetjeve dhe konkluzioneve paraprake, dua t’ju përcjell pritshmërinë që këto raporte të pasqyrojnë me saktësi realitetet e observuara në terren gjatë procesit elektoral’.
Dhe vazhdon: ‘Në këtë drejtim, dua të shpreh shqetësimin serioz (imagjinoni ju çfarë mafiozësh janë këta, ata sa e kanë lexuar raportin, dhe ky sikur t’ua ketë marrë kopjen para) lidhur me paragrafin hyrës të deklaratës, në të cilin bëhet një paraqitje thellësisht negative në pikëpamjen tonë dhe e pabalancuar e zgjedhjeve parlamentare të vitit 2025’.”, shprehet Berisha.
