Policia e Shkodrës ka si pistë kryesore hakmarrjen në ekzekutimin e 65-vjeçarit Frrok Lleshajt. Policia ka marrë në pyetje 12 persona të cilët mund të kenë dijeni për ngjarjen.
Sipas të dhënave, Frrok Lleshaj është qëlluar me pistoletë nga një distancë e afërt. Dyshohet se autori është larguar me motoçikletë, duke përfituar nga errësira për t’u zhdukur me shpejtësi nga vendi i krimit.
Pista kryesore është hasmëria mes familjes Lleshaj dhe dy familjeve të tjera në fillim të vitet ’90, ku deri tani janë pesë viktima.
Frrok Lleshaj është i treti që vritet pas djalit dhe vëllait të tij në fillim të viteve ’90, ndërsa të vrarë janë edhe kushëriri i tij Dodë Lleshaj, me të cilin nisi konflikti, si dhe një person tjetër nga Puka.
Ngjarja e parë ndodhi në vitin 1991, kur djali i 65-vjeçarit u vra në Greqi. Asokohe u tha se i riu ishte vrarë nga policia greke në rrethana të paqarta, por familja e Frrok Lleshajt dyshonte se pas ngjarjes fshiheshin kushërinjtë e tij.
Disa vite më vonë, dyshohet se Frrok Lleshaj mori gjakun e djalit të tij duke vrarë kushëririn Dodë Lleshaj. Megjithatë, ai nuk e pranoi asnjëherë autorësinë e kësaj ngjarjeje.
Ndërkohë, një tjetër konflikt lindi me një familje nga Puka. Frrok Lleshaj qëlloi për vdekje një person tjetër, për të cilin e pranoi autorësinë në gjykatë dhe u dënua me 25 vite burg.
Nga këto dy hasmëri të vjetra dhe ende të pambyllura, mbetet i vrarë edhe vëllai i Frrok Lleshajt. Ai kishte dalë nga burgu në vitin 2023. Pas daljes nga burgu, ishte braktisur nga familja, gruaja dhe fëmijët, dhe jetonte i vetëm në fshatin Paçram, duke u marrë me blegtori.
