Në zonën e minuar “Piramida 12” në kufi me Greqinë, pranë Parkut Natyror të Gërmenjes në bashkinë Kolonjë, zjarri vazhdon të mbetet aktiv me rrezik përhapjeje për shkak të erës.
Autoritetet bëjnë me dije se nga mbrëmë nuk ka pasur zgjerim të flakëve, por situata mbetet e ndjeshme.
Në terren janë angazhuar rreth 40 forca zjarrfikëse, ndërsa shërbimi i bashkisë po hap rrugë për të lehtësuar qasjen e mjeteve.
Për shkak të zonës së minuar, efektivët nuk mund të afrohen shumë pranë zjarrit.
Një grup xheniozësh nga Tirana është nisur për të bërë demontimin e minave të konstatuara në terren, duke siguruar kështu ndërhyrje më të sigurt.
