Vladimir Putin është një “grabitqar, një përbindësh në pragun tonë” që “duhet të vazhdojë të hajë” për “mbijetesën” e tij, paralajmëron Presidenti francez Emmanuel Macron duke u bërë thirrje evropianëve të mos jenë naivë përballë një Rusie që do të jetë “vazhdimisht një forcë destabilizuese”.
“Që nga viti 2007-2008 (kur Rusia pushtoi Gjeorgjinë), Presidenti Putin rrallë i ka mbajtur angazhimet e tij. Ai ka qenë një forcë e vazhdueshme destabilizuese. Dhe ai është përpjekur të rishikojë regjimin kufitar për të zgjeruar pushtetin e tij”, tha Emmanuel Macron në një intervistë me rrjetin LCI.
Presidenti francez beson se “Rusia është bërë një forcë e përhershme destabilizuese dhe një kërcënim potencial për shumë prej nesh”.
“Një vend që investon 40% të buxhetit të tij në pajisje të tilla (ushtarake), që ka mobilizuar një ushtri prej më shumë se 1.3 milion njerëzish, nuk do të bëhet një shtet paqeje dhe një sistem demokratik i hapur brenda natës”, paralajmëroi ai.
“Rrjedhimisht, dhe për mbijetesën e tij, (Putini) duhet të vazhdojë të hajë. Kjo. Dhe kështu ai është një grabitqar, ai është një përbindësh në pragun tonë. Nuk po them se nesër është radha e Francës për t’u sulmuar, por ai më në fund është një kërcënim për evropianët dhe ne nuk duhet të jemi naivë”, tha ai.
Në një intervistë tjetër me NBC News, Emmanuel Macron nuk e fshehu pesimizmin e tij në lidhje me mundësinë e arritjes së një marrëveshjeje paqeje. “Kur shoh situatën dhe ngjarjet, nuk e shoh Presidentin Putin që dëshiron paqe tani, por ndoshta po tregohem shumë pesimist”.
