Shefat e shtabeve të NATO-s do të mblidhen me videokonferencë të mërkurën për të diskutuar luftën në Ukrainë, si pjesë e bisedimeve midis aleatëve të Kievit mbi garancitë e sigurisë në rast të një marrëveshjeje paqeje me Moskën.
Telekonferenca zhvillohet në kontekstin e mobilizimit intensiv diplomatik pas takimit të Donald Trump me Vladimir Putin në Alaska.
Dje, Trump tha se ishte gati të ofronte mbështetje ajrore si pjesë e garancive të sigurisë për Ukrainën në rast të një marrëveshjeje paqeje me Rusinë.
Megjithatë, ai përjashtoi mundësinë e vendosjes së forcave ushtarake amerikane në tokën ukrainase, një mision që aleatët evropianë të Ukrainës janë të thirrur ta ndërmarrin.
“Ata janë gati të dërgojnë forca atje”, tha presidenti amerikan në Fox News, duke iu referuar udhëheqësve të Francës, Britanisë dhe Gjermanisë, të cilët i kishte mirëpritur një ditë më parë në Zyrën Ovale.
Rusia paralajmëroi se çdo zgjidhje paqeje do të duhej të garantonte “sigurinë” e saj dhe sigurinë e rusishtfolësve të Ukrainës.
Presidenti amerikan mirëpriti Presidentin ukrainas Volodymyr Zelensky në Shtëpinë e Bardhë tre ditë pas takimit në Alaskë.
