Deputeti i Partisë Demokratike Tritan Shehu ka deklaruar se Sali Berisha mbetet figura që mban të bashkuar si PD-në, ashtu edhe opozitën në tërësi duke e cilësuar atë si burim qëndrese dhe optimizmi.
Në një reagim në rrjetet sociale Shehu tha se përballja me qeverinë kërkon lëvizje popullore dhe rikthimin e rregullave demokratike që sipas tij janë objektiva të rëndësishëm jo vetëm për opozitën, por për shoqërinë në tërësi.
Ai theksoi gjithashtu rëndësinë e Parlamentit si një arenë politike pavarësisht situatës aktuale duke e konsideruar atë një mjet për të denoncuar regjimin për të prezantuar alternativa dhe për të sensibilizuar opinionin publik brenda dhe jashtë vendit.
