Zbardhen detaje të reja nga atentati me dy të vdekur dhe dy të plagosur sot në Shkodër. Të vdekur kanë mbetur Armando Pali dhe Lirodon Kraja, krahu i Erogen Brajoviç, i cili u plagosur nga plumbat dhe që dyshohet se ishte shënjestër.
Erogen Brajoviç bashkë me kamarieren e lokalit kanë mbetur të plagosur dhe ndodhen në spital. Rakip Gilla është arrestuar në zonën e njohur si “Zalli i Kirit” disa km larg vendit të ngjarjes.
Pas krimit është larguar nga lokali me një motor dhe rrugës ka bërë një aksident me një makinë. Policia i është vënë në ndjekje dhe në zonën e lumit të Kirit ka lënë makinën për t’u larguar në këmbë bashkë më armën në krahë. Pas rrethimit është dorëzuar.
Shkodër/ Informacion paraprak
Rreth orës 08:50, në lagjen “Qemal Stafa”, në ambientet e jashtme të një lokali, dyshohet se shtetasi R. G. ka qëlluar me armë zjarri dhe si pasojë janë plagosur shtetasi E. V. (B.), 43 vjeç, i cili ndodhet nën kujdesin e mjekëve, si dhe shtetasja M. K., 25 vjeçe, e cila është dëmtuar lehtë.
Gjithashtu, si pasojë e të shtënave, ka humbur jetën në vendngjarje shtetasi A. P., ndërsa në Spitalin Rajonal Shkodër ka ndërruar jetë edhe shtetasi L. K. (L.), 31 vjeç.
Shërbimet e Policisë kanë shkuar menjëherë në vendngjarje dhe janë vënë në ndjekje të autorit. Pas disa minutash ndjekjeje, bënë të mundur kapjen e tij dhe sekuestruan një armë zjarri automatike.
Ndërkaq, grupi hetimor, nën drejtimin e Prokurorisë, vijon punën për zbardhjen e rrethanave të ngjarjes.
