Kremlini ka hedhur poshtë ndryshimin e qëndrimit të Presidentit të SHBA-së Donald Trump për luftën në Ukrainë. Trump tha pas takimit me Zelenskyn se Kievi mund të rimarrë të gjithë territorin e kontrolluar nga Rusia.
Kremlini thotë se Trump është ndikuar nga udhëheqësi i Ukrainës dhe se po gabon me qëndrimin e tij.
“Për aq sa kuptojmë ne, deklaratat e Presidentit Trump u bënë pas komunikimit të tij me (Presidentin ukrainas) Zelensk dhe, me sa duket, nën ndikimin e një vizioni që Zelensky paraqiti. Ky vizion bie ndesh ashpër me kuptimin tonë për gjendjen aktuale të punëve”, u tha gazetarëve zëdhënësi i Kremlinit, Dmitry Peskov.
Më pas ai shtoi se “Fakti që Ukraina po inkurajohet në çdo mënyrë të mundshme të vazhdojë armiqësitë dhe argumenti se Ukraina mund të fitojë dhe të marrë diçka mbrapsht është, sipas mendimit tonë, një argument i rremë… Dinamika në vijën e frontit flet vetë.”
