Seanca e radhës në gjyqin për rastin e sterilizimit, ku përballë akuzave janë ish-zëvendësministri i Shëndetësisë Klodian Rrjepaj, biznesmeni Ilir Rrapaj dhe gjashtë të tjerë, u shty pas kërkesës së mbrojtësve për më shumë kohë për të përgatitur argumentet e tyre mbi provat që paraqiti SPAK-u.
Prokurorët kundërshtuan këtë kërkesë duke argumentuar se mbrojtja ka pasur kohën e duhur për t’u përgatitur.
Gjykata vendosi të ndërpresë afatet e paraburgimit për të pandehurit dhe caktuar seancën e radhës më 15 tetor në orën 13:00.
SPAK kërkon dënime deri në 10 vite burg për dy figurat kryesore, ndërsa për zyrtarët e tjerë kërkohen dënime më të lehta, përfshirë dënime me kusht për disa prej tyre.
