Rusia ka kryer natën sulmin më të madh që nga fillimi i pushtimit në 2022 ndaj impianteve të prodhimit të gazit në Ukrainë, duke përdorur 35 raketa dhe 60 dronë, njoftoi kompania shtetërore ukrainase Naftogaz. Sulmet kanë prekur zona si Kharkov dhe Poltava, duke shkaktuar dëme serioze në infrastrukturën energjetike.
Kryeministrja ukrainase Julia Sviridenko e cilësoi këtë veprim si “terrorizëm ndaj civilëve” dhe një përpjekje për të prishur ngrohjen gjatë dimrit. Kreu i Naftogaz, Serhiy Koretsky, tha se sulmet nuk kanë qëllim ushtarak, por synojnë vetëm të lënë ukrainasit pa ngrohje.
Në përgjigje, Ukraina ka intensifikuar sulmet ndaj rafinerive në territorin rus, duke goditur edhe një rafineri në rajonin Orenburg, rreth 1,400 km larg.
Nga sulmi rus, 18 raketa dhe 78 dronë u neutralizuan nga forcat ukrainase, ndërsa Rusia pretendon se ka goditur objektiva ushtarake dhe infrastruktura të rëndësishme.
