Izraeli dhe Hamasi do të fillojnë të hënën negociatat e ndërmjetësuara nga një palë e tretë, të cilat synojnë t’i japin fund konfliktit dyvjeçar në Gaza, i cili ka destabilizuar Lindjen e Mesme.
I pyetur jashtë Shtëpisë së Bardhë të dielën, siç raportohet nga Guardian, nëse kishte fleksibilitet në planin 20-pikësh, Trump u përgjigj: “Nuk kemi nevojë për fleksibilitet, sepse të gjithë janë dakord me të. Por gjithmonë do të ketë disa ndryshime”, tha Donald Trump. “Por plani i Hamasit, do t’ju them, është i mahnitshëm”.
“Ata kanë vite që luftojnë për një plan. Po i marrim pengjet pothuajse menjëherë. Negociatat janë duke vazhduar tani, ndoshta do të zgjasin disa ditë dhe njerëzit janë shumë të lumtur për këtë”, shtoi ai.
Egjipti, një ndërmjetës kyç në bisedimet e paqes, tha se do të priste delegacione nga të dyja palët për të diskutuar shkëmbimin e mundshëm të pengjeve izraelite me të burgosurit palestinezë, raportoi Bloomberg.
Siç u bë e ditur të dielën në mbrëmje, negociatat do të zhvillohen në Sharm el-Sheikh, sipas një zyrtari egjiptian dhe tre burimeve izraelite, siç raportohet nga CNN.
I dërguari special i SHBA-së, Steve Witkoff, dhe dhëndri i Trump, Jared Kushner, udhëtuan gjithashtu për në Egjipt për të marrë pjesë në negociata, të cilat vijnë pas kërkesës së Hamasit për të diskutuar disa elementë të planit 20-pikësh të presidentit amerikan për t’i dhënë fund luftës.
Një zyrtar izraelit tha se ushtria kishte marrë një qëndrim mbrojtës në Qytetin e Gazës, ndërsa Hamasi tha se sulmet ajrore dhe bombardimet po vazhdonin në kryeqytetin de facto të enklavës, duke vrarë dhjetëra njerëz.
“Pse je gjithë kohës kaq negativ?”- Trump shpërthen kundër Netanyahut: Ultimatum i ri për Hamasin
