Haoliang Xu, Nënsekretari i Përgjithshëm i OKB-së dhe drejtues i përkohshëm i UNDP-së, ka nisur një vizitë dyditore në Shqipëri më 6 dhe 7 tetor. Gjatë qëndrimit të tij, ai pritet të zhvillojë takime me kryeministrin Edi Rama, ministra të kabinetit, si dhe përfaqësues të organizatave ndërkombëtare të zhvillimit.
Vizita e tij përqendrohet në mbështetjen që OKB dhe UNDP ofrojnë për Shqipërinë në rrugën drejt integrimit evropian dhe përmbushjes së Objektivave të Zhvillimit të Qëndrueshëm.
Një nga ndalesat kryesore të agjendës është vizita në shkollën “Emin Duraku” në Tiranë, e rindërtuar si pjesë e projektit EU4Schools, pas tërmetit të vitit 2019 – një simbol i angazhimit për mjedise arsimore të sigurta dhe moderne.
Përmes kësaj vizite, OKB riafirmon përkushtimin për të bashkëpunuar me Shqipërinë në fusha si drejtësia, ekonomia gjithëpërfshirëse, mbrojtja e mjedisit dhe ndërtimi i institucioneve të qëndrueshme.
