Deputetja e Partisë Demokratike, Jorida Tabaku, gjatë seancës në Komisionin e Ekonomisë, Financave dhe Punësimit ngriti shqetësime për situatën ekonomike në vend. Ajo ironizoi nisjen e sistemit SEPA më 1 tetor, duke theksuar se qeveria kishte shpërndarë informacion të gabuar për datën.
Tabaku u fokusua te dobësitë e ekonomisë shqiptare, ku 60% e rritjes mbështetet te ndërtimi, ndërsa sektorë të rëndësishëm si industria dhe bujqësia po bien. Ajo kritikoi shifrat zyrtare për inflacionin, që sipas saj nuk përputhen me realitetin e qytetarëve, të cilët po përballen me rritje të çmimeve dhe kosto jetese.
Deputetja paralajmëroi se ekonomia po mbahet me turizmin dhe remitancat, një model që nuk është i qëndrueshëm. Në fund, ajo kërkoi rikthimin e propozimeve ligjore për mbrojtjen e konsumatorëve në mikrofinancë dhe tha se Parlamenti duhet të marrë rolin kontrollues për të mos lejuar që ekonomia të shfrytëzohet nga pakicat në pushtet, ndërsa qytetarët vuajnë.
